Kambal na Estudyante, Patay sa Hit-and-Run sa Nueva Vizcaya

NUEVA VIZCAYA– Nasawi ang kambal na Grade 11 students matapos silang mabangga ng isang van sa Barangay Munguia, Nueva Vizcaya nitong Lunes.

Ayon sa pulisya, tumakas ang driver ng van matapos ang insidente at iniwan ang sasakyan sa kalsada. Naisugod pa sa ospital ang kambal na 16-anyos, ngunit hindi na sila naisalba ng mga doktor.

Ayon sa ama ng kambal na si Armando Balagat, pauwi ang magkapatid noong tanghali upang kumuha ng mga gulay na kanilang babaunin para sa isang track-and-field competition. Dahil sa kakulangan ng pampasaherong sasakyan sa kanilang lugar, napilitan silang gumamit ng motorsiklo upang makapasok sa paaralan.

“Masyado silang nasasabik sa paligsahan. Masaya pa kaming nag-usap bago sila umalis,” pagbabahagi ng ama. Ngunit sa kanilang pagbabalik sa paaralan, doon na nangyari ang trahedya.

Batay sa imbestigasyon ng Dupax del Norte police, parehong nasa magkabilang direksyon ang motorsiklo at ang van nang maganap ang banggaan. Ayon sa ulat, paliko na sana sa kaliwa ang van nang masalpok nito ang kambal.

Hiling ng pamilya Balagat na lumantad at harapin ng driver ang kanyang responsibilidad. Ayon sa pulisya, tukoy na nila ang pagkakakilanlan ng suspek, ngunit patuloy pa rin itong pinaghahanap ng mga awtoridad.